「台灣圖書室」鄭書勉女士、主持人張素華女士、在場濟濟思念蔡文旭 ê 親朋好友：今仔日，咱逗陣來數念（Siàu-liām）蔡文旭，我分作三點來講：第一、伊 ê 勇敢；第二、伊 ê 藝術；第三、伊 ê 情義。
第一、「勇敢在膽」
37 年前，台灣 ê 總統府廣場，咱 bē 使遊行，咱 bē 使示威，咱 bē 使講「台灣獨立」。有一工，阮決定欲去總統府廣場，遊行示威 sak 台獨言論自由。有一 ê 24 歲 ê 少年人，伊規場 hōaⁿ mai-ku（麥克風），遊行隊伍行呀行，突然間，伊喊出一句口號，「台灣獨立萬歲！」。
彼當時，全場群眾恬卒卒，無人敢應一聲，眾人驚一-tiô，伊家己 mā 驚一咧。我嘛心頭嚇一-ē，但是，伊真在膽，驚罔驚，剉罔剉（chhoah），伊擱繼續向前行，來完成 chi̍t 場遊行示威。
37 年前，tī 台灣戒嚴時期，舉行台獨遊行示威，這是全台灣第一場！Chi̍t ê 24歲 ê 少年人，遊行示威喊出「台灣獨立萬歲！」，伊是全台灣第一 ê！這 tō 是蔡文旭，咱數念伊 ê 勇敢在膽！
第二、「藝術才情」
咱今仔日看-tio̍h 現場字圖 ê 佈置，予我想起蔡文旭 ê 藝術才情。37 年前，有一工，我 kah 文旭兩 ê 人，找-tio̍h 一 ê 所在，欲來寫台獨布條仔，提去踅全島。
文旭 chi̍t ê 兄弟，對我真體貼，我 tī 遐，大筆 sah 起來，欲來 tàu 寫布條仔，但是，伊 tio̍h 趕緊 kah 我講，「蓋世，我來 tio̍h 好，你先返去休睏啦！」，煞落來，伊一 ê 人匿 tī 遐，開幾-ā 點鐘，慢慢仔寫，寫出「台灣人走台灣路」、「命運之旅」、「人民有主張台灣獨立的自由」……等訴求 ê 布條，一條擱一條，落尾完成 7～8 條宣揚台獨 ê 大布條。
後來，伊所寫 ê 大布條，阮 sa 去南北二路，全島 iāⁿ-iāⁿ 飛，飛 kàu 台灣頭，飛 kàu 台灣尾，飛 kàu 花蓮台東，街頭巷尾！
最近，我整理舊相片，看-tio̍h 阮當年寫 ê 海報布條，我 chia 自我檢討，「古早，我寫 ê 字，有卡醜淡薄 á，文旭寫 ê 字，有夠水！」莫怪彼工，伊對我 hiah-nī 體貼，我 gia̍h-筆欲寫布條仔，伊趕緊講「我來 tio̍h 好」，tī 伊眼中，遊行示威 ê 布條仔，嘛是愛講究，嘛是愛追求藝術 ê 美感。
這 tio̍h 是蔡文旭，咱數念伊 ê 藝術才情！
第三、「情義相伨（sio-thīn）」
33 年前，國民黨政權全力打壓台獨運動。阮選一工，欲來召開「獨盟大會」，挑戰「台獨最高禁忌」。
大會召開前兩三工，國民黨政權抓狂，將阮 chit 寡，chhōa-頭幹部，一 ê 一 ê 掠去籠仔內。大會前兩天，他們將我掠去，押 tī 台中看守所，彼間牢房裡，有一頂雙層的鐵眠床，牢房頂頭，有一支日光燈，開規暗，bē-使關掉。管理員叫我睡 tī 鐵眠床頂層。
Bú 規工，我已經足 thiám á，但是我一躺落眠床，拄拄-á 好，一支日光燈，規暗照我 ê 目睭，真 bē 慣習，人 thenn 眠床，頭殼一直 teh 想 tio̍h，「外口情形，安全否？過兩天，大會 beh 安怎 leh？……」
結果咧，人掠去，會照開，外口文旭 kah 濟濟勇敢 ê 兄弟姊妹，逐家來相挺，其中，「總幹事」江蓋世 hō͘ in 掠去，邱旭川接任「總幹事」，「副總幹事」鄒武鑑 hō͘ in 掠去，蔡文旭接任「副總幹事」，今仔日在座 mā 有咱 chit 位台語詩人陳明仁，當年，伊 kah 規位兄姊 mā 攏參加大會主席團。
當日，海外獨盟秘書長王康陸，kah 郭正光等人，攏突破黑名單，出現 tī 大會……回顧 chit 場事件，文旭 kah 咱 ê 兄弟，面對打壓，in 無跑去匿，in 出來擔重擔，in 大會照常開！
這 tō 是蔡文旭，咱數念伊 ê 情義相伨（sio-thīn）！
結語
今仔日，咱 tī 遮數念，少年仔蔡文旭，咱數念伊，喊出台灣第一聲，伊 ê「勇敢在膽」；咱數念伊，布條全島 iāⁿ-iāⁿ 飛，伊 ê「藝術才情」；咱數念伊，兄弟相伨開大會，伊 ê「情義相伨」。Kám-siā！
江蓋世，2024／01／21，發表 tī《文旭思念會》，嘉義市「台灣圖書室」。
